കേരള ന്യൂസ് മീഡിയ
റിപ്പോർട്ട്: ദൗ ല ത് ഷാ എം
തിരുവനന്തപുരം: തുറമുഖങ്ങളെയും കടൽ അധിഷ്ഠിത വ്യവസായങ്ങളെയും കേന്ദ്രീകരിച്ച് കേരളത്തിന്റെ സാമ്പത്തിക വളർച്ച വേഗത്തിലാക്കാൻ സംസ്ഥാന സർക്കാർ ‘മിഷൻ സമുദ്ര’ പദ്ധതി പ്രഖ്യാപിച്ചു. 400 കോടി രൂപയുടെ ഈ പദ്ധതിയിലൂടെ കേരളത്തെ ആഗോള സമുദ്ര വ്യാപാര-ലോജിസ്റ്റിക്സ് കേന്ദ്രമാക്കി മാറ്റുകയാണ് ലക്ഷ്യം.
600 കിലോമീറ്റർ നീളമുള്ള കേരള തീരപ്രദേശം, വിഴിഞ്ഞം ട്രാൻസ്ഷിപ്പ്മെന്റ് തുറമുഖം, രണ്ട് അന്താരാഷ്ട്ര തുറമുഖങ്ങൾ, 17 ചെറു തുറമുഖങ്ങൾ, ഉൾനാടൻ ജലപാതകൾ എന്നിവയെ ഒരു ഏകീകൃത സമുദ്ര സാമ്പത്തിക ശൃംഖലയായി വികസിപ്പിക്കാനാണ് പദ്ധതി ലക്ഷ്യമിടുന്നത്.
ആദ്യ ഘട്ടത്തിൽ തീരദേശ ചരക്ക് ഗതാഗതം ശക്തിപ്പെടുത്തുന്നതിനും റോഡ് ഗതാഗതത്തിന്റെ സമ്മർദം കുറയ്ക്കുന്നതിനും പ്രാധാന്യം നൽകും. തുടർന്ന് ക്രൂയിസ് ടൂറിസം, നദീ ടൂറിസം, സമുദ്ര അധിഷ്ഠിത സേവന മേഖലകൾ എന്നിവയും വികസിപ്പിക്കും.
കേരളത്തിന് ബ്ലൂ ഇക്കോണമിയിൽ വലിയ സാധ്യതകളുണ്ടെന്നും ഇന്ത്യയുടെ പ്രധാന സമുദ്ര കവാടമായി മാറാൻ സംസ്ഥാനത്തിന് കഴിവുണ്ടെന്നും മുഖ്യമന്ത്രി വി.ഡി. സതീശൻ നേരത്തെ വ്യക്തമാക്കിയിരുന്നു. സമുദ്ര വിഭവങ്ങളുടെ സുസ്ഥിര ഉപയോഗം, തൊഴിൽ സൃഷ്ടി, കയറ്റുമതി വർധന എന്നിവയ്ക്കും പദ്ധതി ഊന്നൽ നൽകുന്നു.
വിഴിഞ്ഞം തുറമുഖത്തെ കേന്ദ്രീകരിച്ചുള്ള ലോജിസ്റ്റിക്സ് ശൃംഖല, ചരക്ക് കൈമാറ്റം, കപ്പൽ സേവനങ്ങൾ, തീരദേശ വ്യവസായങ്ങൾ എന്നിവ വികസിക്കുന്നതോടെ കേരളത്തിന്റെ വരുമാന അടിത്തറ വിപുലമാകുമെന്നാണ് സർക്കാർ പ്രതീക്ഷിക്കുന്നത്.
കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ: https://whatsapp.com/channel/0029Vb7Ks1v1t90adn8xFf2w
കേരള ന്യൂസ് മീഡിയ ഇ-പേപ്പർ: https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3
കൂടുതൽ വാർത്തകൾ വായിക്കാൻ: www.keralanewsmediaonline.com
