കേരള ന്യൂസ് മീഡിയ

റിപ്പോർട്ട്: ദൗ ല ത് ഷാ എം

യുണൈറ്റഡ് അറബ് എമിറേറ്റ്സിൽ വർഷത്തിലെ ഏറ്റവും ചൂടേറിയ 40 ദിവസങ്ങൾക്ക് ഇന്ന് തുടക്കമായി. ‘ജംറത് അൽ ഖൈദ്’ (Jamrat Al Qayth) എന്നറിയപ്പെടുന്ന ഈ കാലയളവ് ഓഗസ്റ്റ് 10 വരെ തുടരും. ഈ ദിവസങ്ങളിൽ മരുഭൂമിപ്രദേശങ്ങളിൽ താപനില 50 ഡിഗ്രി സെൽഷ്യസിന് മുകളിലെത്താനും ചൂടേറിയ വരണ്ട സമൂം കാറ്റ് ശക്തമാകാനും സാധ്യതയുണ്ടെന്ന് കാലാവസ്ഥാ വിദഗ്ധർ മുന്നറിയിപ്പ് നൽകി.

എമിറേറ്റ്സ് ആസ്ട്രോണമിക്കൽ സൊസൈറ്റിയുടെ കണക്കുപ്രകാരം അറേബ്യൻ ഉപദ്വീപിലെ ഏറ്റവും കടുത്ത വേനൽക്കാലഘട്ടമാണ് ഇത്. പകൽ സമയത്ത് പുറം ജോലികൾ പരമാവധി ഒഴിവാക്കുക, ധാരാളം വെള്ളം കുടിക്കുക, നേരിട്ട് സൂര്യപ്രകാശം ഏൽക്കുന്നത് കുറയ്ക്കുക, കുട്ടികളെയും പ്രായമായവരെയും പ്രത്യേകമായി സംരക്ഷിക്കുക തുടങ്ങിയ നിർദേശങ്ങൾ അധികൃതർ നൽകിയിട്ടുണ്ട്.

അബുദാബി, ദുബായ് ഉൾപ്പെടെയുള്ള നഗരങ്ങളിൽ ഉച്ചസമയത്ത് പുറത്തുള്ള ജോലികൾക്ക് നിയന്ത്രണങ്ങൾ തുടരുമെന്നും തൊഴിലാളികളുടെ സുരക്ഷ ഉറപ്പാക്കാൻ സ്ഥാപനങ്ങൾ നിർദേശങ്ങൾ കർശനമായി പാലിക്കണമെന്നും അധികൃതർ അറിയിച്ചു. ഉയർന്ന താപനിലയോടൊപ്പം പൊടിക്കാറ്റും ഈർപ്പനിലയിലെ വ്യതിയാനവും അനുഭവപ്പെടാൻ സാധ്യതയുണ്ട്.

ഗൾഫ് മേഖലയിലെ വേനൽക്കാലത്തിന്റെ ഏറ്റവും കഠിനമായ ഘട്ടമായതിനാൽ ആരോഗ്യപ്രശ്നങ്ങൾ ഒഴിവാക്കാൻ പൊതുജനങ്ങൾ അതീവ ജാഗ്രത പാലിക്കണമെന്ന് കാലാവസ്ഥാ വിദഗ്ധർ ആവർത്തിച്ചു. കാലാവസ്ഥാ മുന്നറിയിപ്പുകൾ തുടർച്ചയായി പിന്തുടരാനും അടിയന്തര സാഹചര്യങ്ങളിൽ ആരോഗ്യസേവനങ്ങളുടെ നിർദേശങ്ങൾ പാലിക്കാനും അധികൃതർ അഭ്യർഥിച്ചു.

കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ:

https://whatsapp.com/channel/0029Vb7Ks1v1t90adn8xFf2w

കേരള ന്യൂസ് മീഡിയ ഇ പേപ്പർ:

https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3

കൂടുതൽ വാർത്തകൾ വായിക്കാൻ:

www.keralanewsmediaonline.com