കേരള ന്യൂസ് മീഡിയ

റിപ്പോർട്ട്: കിരൺ എസ് പിള്ളൈ

ബ്രസീൽ സൂപ്പർതാരം നെയ്മറുടെ ലോകകപ്പ് തിരിച്ചുവരവ് ഫുട്ബോൾ ആരാധകർക്ക് വികാരനിർഭരമായ നിമിഷമായി മാറി. ഗുരുതരമായ കാൽമുട്ട് പരിക്കും പിന്നീട് ഉണ്ടായ പേശിവലിവും കാരണം ഏകദേശം 981 ദിവസത്തോളം ദേശീയ ടീമിൽ നിന്ന് വിട്ടുനിന്ന നെയ്മർ സ്‌കോട്‍ലൻഡിനെതിരായ മത്സരത്തിലാണ് വീണ്ടും മഞ്ഞ ജഴ്‌സി അണിഞ്ഞത്. രണ്ടാം പകുതിയിൽ പകരക്കാരനായി കളത്തിലെത്തിയ താരത്തെ ആരാധകർ എഴുന്നേറ്റ് നിന്നാണ് വരവേറ്റത്.

മത്സരത്തിന് ശേഷം ഡ്രസിങ് റൂമിൽ ഒറ്റയ്ക്ക് ഇരുന്ന് കരഞ്ഞതായി നെയ്മർ വെളിപ്പെടുത്തി. വീണ്ടും ബ്രസീലിനായി കളിക്കാനായ സന്തോഷവും നീണ്ട കാത്തിരിപ്പിന്റെ അവസാനവും തന്നെ വികാരാധീനനാക്കിയെന്ന് അദ്ദേഹം പറഞ്ഞു. ദേശീയ ടീമിനായി കളിക്കുക എന്നത് ജീവിതത്തിലെ ഏറ്റവും വലിയ അഭിമാനമാണെന്നും അദ്ദേഹം കൂട്ടിച്ചേർത്തു.

അതേസമയം ഈ ബ്രസീൽ ടീമിന്റെ പുതിയ മുഖമായി വിനീഷ്യസ് ജൂനിയർ ഉയർന്നുവന്നിട്ടുണ്ടെങ്കിലും നെയ്മറുടെ അനുഭവസമ്പത്ത് ടീമിന് വലിയ കരുത്താണ് നൽകുന്നത്. പരിശീലകൻ കാർലോ ആൻചലോട്ടി നെയ്മറെ പതിയെ മത്സര താളത്തിലേക്ക് തിരികെ കൊണ്ടുവരാനാണ് ശ്രമിക്കുന്നത്. നോക്കൗട്ട് റൗണ്ടിൽ കൂടുതൽ സമയം കളിക്കാൻ അദ്ദേഹത്തിന് അവസരം ലഭിക്കുമെന്നാണ് പ്രതീക്ഷ.

റൗണ്ട് ഓഫ് 32ൽ ജപ്പാനെയാണ് ബ്രസീൽ നേരിടുന്നത്. ലോകകപ്പ് കിരീടം തിരിച്ചുപിടിക്കാനുള്ള ബ്രസീലിന്റെ സ്വപ്നയാത്രയിൽ നെയ്മറുടെ തിരിച്ചുവരവ് വലിയ ആത്മവിശ്വാസമാണ് നൽകുന്നത്. വർഷങ്ങളുടെ പോരാട്ടത്തിനൊടുവിൽ വീണ്ടും ലോകവേദിയിൽ പന്തുതട്ടുന്ന ബ്രസീൽ ഇതിഹാസത്തിന്റെ ഓരോ സ്പർശവും ആരാധകർ ആവേശത്തോടെയാണ് നോക്കിക്കാണുന്നത്.

കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ:

https://whatsapp.com/channel/0029Vb7Ks1v1t90adn8xFf2w

കേരള ന്യൂസ് മീഡിയ ഇ പേപ്പർ:

https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3

കൂടുതൽ വാർത്തകൾ വായിക്കാൻ:

www.keralanewsmediaonline.com