കേരള ന്യൂസ് മീഡിയ

റിപ്പോർട്ട്: കിരൺ എസ് പിള്ളൈ

ആഫ്രിക്കയിലെ രണ്ടാമത്തെ വലിയ ചെമ്പ് കയറ്റുമതിക്കാരായ സാംബിയ, നിർണായക ധാതുക്കളുടെ പേരിൽ അമേരിക്കയുടെയോ ചൈനയുടെയോ രാഷ്ട്രീയ പക്ഷം പിടിക്കില്ലെന്ന് പ്രസിഡന്റ് ഹകൈൻഡെ ഹിച്ചിലേമ വ്യക്തമാക്കി. രാജ്യത്തിന്റെ ധാതു സമ്പത്ത് ദേശീയ വികസനത്തിനായാണ് ഉപയോഗിക്കേണ്ടതെന്നും, വിദേശ നിക്ഷേപം പരസ്പര നേട്ടത്തിന്റെ അടിസ്ഥാനത്തിലായിരിക്കണമെന്നും അദ്ദേഹം പറഞ്ഞു.

ലോകത്ത് ചെമ്പ്, കോബാൾട്ട് തുടങ്ങിയ ധാതുക്കൾക്ക് ആവശ്യകത വർധിച്ചതോടെ സാംബിയയിൽ അമേരിക്ക, ചൈന, യൂറോപ്യൻ യൂണിയൻ എന്നിവ നിക്ഷേപം വർധിപ്പിക്കുകയാണ്. എന്നാൽ ഒരു രാജ്യവുമായി മാത്രം ചേർന്ന് പ്രവർത്തിക്കുന്നതിന് പകരം എല്ലാ രാജ്യങ്ങളിൽ നിന്നുമുള്ള നിക്ഷേപം സ്വീകരിക്കാനാണ് സാംബിയയുടെ തീരുമാനം.

2026 അവസാനത്തോടെ വാർഷിക ചെമ്പ് ഉൽപാദനം 10 ലക്ഷം ടണ്ണിലെത്തിക്കാനാണ് സാംബിയയുടെ ലക്ഷ്യം. 2031 ഓടെ ഇത് 30 ലക്ഷം ടണ്ണായി ഉയർത്താനാണ് പദ്ധതി. ഇതിനായി 12 ബില്യൺ അമേരിക്കൻ ഡോളറിലധികം പുതിയ നിക്ഷേപങ്ങൾ ഖനന മേഖലയിലേക്ക് എത്തിയതായി സർക്കാർ അറിയിച്ചു.

ലോക ശക്തികൾക്കിടയിലെ ധാതു മത്സരത്തിൽ ആഫ്രിക്ക വെറും അസംസ്കൃത വസ്തുക്കളുടെ വിതരണക്കാരനാകരുതെന്നാണ് സാംബിയയുടെ നിലപാട്. ഖനനം മാത്രമല്ല, സംസ്കരണം, നിർമ്മാണം, തൊഴിലവസര സൃഷ്ടി എന്നിവയും രാജ്യത്തിനുള്ളിൽ നടക്കണമെന്ന നയമാണ് സർക്കാർ പിന്തുടരുന്നത്. ഇതിലൂടെ ധാതു സമ്പത്തിൽ നിന്ന് കൂടുതൽ സാമ്പത്തിക നേട്ടം ആഫ്രിക്കൻ രാജ്യങ്ങൾക്ക് തന്നെ ലഭിക്കുമെന്നാണ് വിലയിരുത്തൽ.

കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ: https://whatsapp.com/channel/0029Vb7Ks1v1t90adn8xFf2w

കേരള ന്യൂസ് മീഡിയ ഇ-പേപ്പർ: https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3

കൂടുതൽ വാർത്തകൾ വായിക്കാൻ: www.keralanewsmediaonline.com