കേരള ന്യൂസ് മീഡിയ

റിപ്പോർട്ട്: സാന്ദ്ര തോമസ്

30,000 കോടി രൂപയിലധികം ചെലവ് വരുന്ന നാല് പ്രധാന അടിസ്ഥാനസൗകര്യ പദ്ധതികളുടെ പുരോഗതി പ്രധാനമന്ത്രി നരേന്ദ്ര മോദി പ്രഗതി അവലോകന യോഗത്തിൽ വിലയിരുത്തി. റോഡ്, വൈദ്യുതി, വ്യാവസായിക ഇടനാഴി, മെട്രോ റെയിൽ എന്നീ മേഖലകളിലെ പദ്ധതികളാണ് പരിശോധിച്ചത്. സമയബന്ധിതമായി പൂർത്തിയാക്കാൻ ഗതി ശക്തി ദേശീയ മാസ്റ്റർ പ്ലാൻ കൂടുതൽ ഫലപ്രദമായി ഉപയോഗിക്കണമെന്ന് പ്രധാനമന്ത്രി നിർദേശിച്ചു.

പദ്ധതികൾ വൈകുന്നത് ചെലവ് വർധിപ്പിക്കുന്നതോടൊപ്പം ജനങ്ങൾക്കും വ്യവസായങ്ങൾക്കും ലഭിക്കേണ്ട വികസന നേട്ടങ്ങൾ വൈകിപ്പിക്കുന്നുവെന്നും അദ്ദേഹം വ്യക്തമാക്കി. കേന്ദ്ര മന്ത്രാലയങ്ങളും സംസ്ഥാന സർക്കാരുകളും തമ്മിലുള്ള ഏകോപനം കൂടുതൽ ശക്തമാക്കി തടസ്സങ്ങൾ ദൗത്യാടിസ്ഥാനത്തിൽ പരിഹരിക്കാനും നിർദേശം നൽകി.

ഗതി ശക്തി ഡിജിറ്റൽ പ്ലാറ്റ്ഫോമിലെ വിവരങ്ങൾ കൃത്യമായി പുതുക്കണമെന്നും യഥാർത്ഥ സ്ഥല വിവരങ്ങൾ, അനുമതികൾ, അടിസ്ഥാനസൗകര്യ വിവരങ്ങൾ എന്നിവ സമയബന്ധിതമായി ഉൾപ്പെടുത്തണമെന്നും പ്രധാനമന്ത്രി ആവശ്യപ്പെട്ടു. ഇതിലൂടെ പദ്ധതികളിലെ തടസ്സങ്ങൾ മുൻകൂട്ടി കണ്ടെത്താനും വേഗത്തിൽ തീരുമാനമെടുക്കാനും സാധിക്കുമെന്ന് അദ്ദേഹം പറഞ്ഞു.

റോഡുകൾ, റെയിൽപാതകൾ, തുറമുഖങ്ങൾ, വിമാനത്താവളങ്ങൾ, വ്യാവസായിക ഇടനാഴികൾ എന്നിവയെ ഏകോപിപ്പിച്ച് രാജ്യത്തിന്റെ അടിസ്ഥാനസൗകര്യ വികസനം വേഗത്തിലാക്കുക എന്നതാണ് ഗതി ശക്തി പദ്ധതിയുടെ ലക്ഷ്യം. ഇന്ത്യയുടെ സാമ്പത്തിക വളർച്ചയ്ക്കും നിക്ഷേപ ആകർഷണത്തിനും ഈ പദ്ധതി നിർണായക പങ്കുവഹിക്കുമെന്നാണ് കേന്ദ്ര സർക്കാരിന്റെ വിലയിരുത്തൽ.

കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ: https://whatsapp.com/channel/0029Vb7Ks1v1t90adn8xFf2w

കേരള ന്യൂസ് മീഡിയ ഇ-പേപ്പർ: https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3

കൂടുതൽ വാർത്തകൾ വായിക്കാൻ: www.keralanewsmediaonline.com