ടെക് ലോകം ആകാംക്ഷയോടെ കാത്തിരിക്കുന്ന ഗൂഗിളിന്റെ അടുത്ത തലമുറ പിക്സൽ സ്മാർട്ട്ഫോൺ ശ്രേണി വരും മാസങ്ങളിൽ അവതരിപ്പിച്ചേക്കുമെന്ന് റിപ്പോർട്ടുകൾ. പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ്എൽ, പിക്സൽ 11 പ്രോ ഫോൾഡ് എന്നിങ്ങനെ നാല് മോഡലുകളാണ് ഈ വർഷം പുറത്തിറങ്ങുമെന്നാണ് സൂചന. ഓഗസ്റ്റിലോ സെപ്റ്റംബറിലോ ആഗോള ലോഞ്ച് നടക്കുമെന്നാണ് പ്രതീക്ഷ.
ഫോൾഡബിൾ വിഭാഗത്തിലെ ഏറ്റവും പ്രീമിയം മോഡലായ പിക്സൽ 11 പ്രോ ഫോൾഡിനാണ് കൂടുതൽ ശ്രദ്ധ ലഭിക്കുന്നത്. എട്ട് ഇഞ്ച് പ്രധാന ഫോൾഡബിൾ ഡിസ്പ്ലേയും 6.4 ഇഞ്ച് പുറം ഡിസ്പ്ലേയും ഈ മോഡലിൽ ഉണ്ടായേക്കുമെന്നാണ് റിപ്പോർട്ടുകൾ. മൾട്ടിടാസ്കിങ്, വീഡിയോ കാണൽ, പ്രൊഡക്ടിവിറ്റി ആവശ്യങ്ങൾ എന്നിവ ലക്ഷ്യമിട്ടാണ് വലിയ സ്ക്രീൻ രൂപകൽപന ചെയ്തിരിക്കുന്നത്.
16 ജിബി റാമും ഒരു ടെറാബൈറ്റ് വരെ സ്റ്റോറേജ് ഓപ്ഷനും പുതിയ മോഡലിൽ ലഭിക്കുമെന്നാണ് പ്രതീക്ഷ. 5,050 എം.എ.എച്ച് ബാറ്ററിയോടൊപ്പം 30 വാട്ട് വയർഡ് ഫാസ്റ്റ് ചാർജിങ് പിന്തുണയും ട്രിപ്പിൾ റിയർ ക്യാമറ സംവിധാനവും ഉൾപ്പെടുമെന്ന് റിപ്പോർട്ടുകൾ സൂചിപ്പിക്കുന്നു. ഗൂഗിളിന്റെ ഏറ്റവും പുതിയ ആർട്ടിഫിഷ്യൽ ഇന്റലിജൻസ് സവിശേഷതകളും പുതിയ ടെൻസർ പ്രോസസറും ഫോണിൽ ഉൾപ്പെടാൻ സാധ്യതയുണ്ട്.
വിലയുടെ കാര്യത്തിൽ പിക്സൽ 11 പ്രോ ഫോൾഡിന് ഏകദേശം 1.60 ലക്ഷം മുതൽ 1.82 ലക്ഷം രൂപ വരെയാകുമെന്നാണ് വിപണി വിലയിരുത്തൽ. മറ്റ് മോഡലുകൾക്ക് ഇതിലും കുറഞ്ഞ വിലയുണ്ടാകുമെന്നാണ് പ്രതീക്ഷ.
എന്നാൽ ഗൂഗിൾ ഇതുവരെ പിക്സൽ 11 സീരീസിന്റെ ഔദ്യോഗിക ലോഞ്ച് തീയതിയോ സാങ്കേതിക വിവരങ്ങളോ പ്രഖ്യാപിച്ചിട്ടില്ല. അതിനാൽ നിലവിൽ പുറത്തുവരുന്ന വിവരങ്ങൾ റിപ്പോർട്ടുകളുടെയും ചോർന്ന വിവരങ്ങളുടെയും അടിസ്ഥാനത്തിലുള്ളവയാണ്. ഔദ്യോഗിക പ്രഖ്യാപനത്തോടെ സവിശേഷതകളിലും വിലയിലും മാറ്റങ്ങൾ ഉണ്ടായേക്കാം.
