കേരള ന്യൂസ് മീഡിയ
റിപ്പോർട്ട്: സജീവ് ഗോപാലൻ
തിരുവനന്തപുരം: മയക്കുമരുന്ന് ശൃംഖലകൾക്കെതിരെ കേരള പൊലീസ് ആരംഭിച്ച സമഗ്ര ലഹരിവിരുദ്ധ നീക്കമായ “ഓപ്പറേഷൻ തൂഫാൻ” ആദ്യ 72 മണിക്കൂറിനുള്ളിൽ തന്നെ ശ്രദ്ധേയമായ ഫലങ്ങൾ കൈവരിച്ചു. സംസ്ഥാനമൊട്ടാകെ നടത്തിയ പരിശോധനകളിൽ 1,500-ലധികം കേസുകൾ രജിസ്റ്റർ ചെയ്യുകയും 1,000-ത്തിലധികം പേരെ അറസ്റ്റ് ചെയ്യുകയും ചെയ്തു. വൻതോതിൽ കൃത്രിമ ലഹരി വസ്തുക്കളും പിടിച്ചെടുത്തു.
സംസ്ഥാന ഇന്റലിജൻസ് സംവിധാനങ്ങളുടെയും വിവിധ സർക്കാർ വകുപ്പുകളുടെയും പിന്തുണയോടെ ഏകീകൃത കമാൻഡ് സംവിധാനത്തിലാണ് കേരള പൊലീസ് നടപടി മുന്നോട്ടുകൊണ്ടുപോയത്. സംസ്ഥാനാന്തര മയക്കുമരുന്ന് വിതരണ ശൃംഖലകളെ ലക്ഷ്യമിട്ടായിരുന്നു പ്രധാന പരിശോധനകൾ.
പുതിയ അധ്യയന വർഷം ആരംഭിക്കുന്നതിന് രണ്ടാഴ്ച മുൻപുതന്നെ ആഭ്യന്തര മന്ത്രി രമേശ് ചെന്നിത്തല പ്രത്യേക പ്രവർത്തന പദ്ധതി തയ്യാറാക്കിയിരുന്നു. സ്കൂൾ പരിസരങ്ങൾ കേന്ദ്രീകരിച്ച് പ്രവർത്തിക്കുന്ന ലഹരി വിതരണക്കാരെ അപ്രതീക്ഷിതമായി പിടികൂടുക എന്നതായിരുന്നു ലക്ഷ്യം.
ആദ്യഘട്ടത്തിൽ പൊലീസ് രഹസ്യ നിരീക്ഷണത്തിലൂടെ ശൃംഖലകളെ തിരിച്ചറിഞ്ഞു. വിദ്യാർത്ഥികൾ ക്ലാസുകളിലേക്ക് മടങ്ങിയെത്തിയതോടെ സംസ്ഥാന വ്യാപകമായി ശക്തമായ പരിശോധനകളും അറസ്റ്റുകളും ആരംഭിക്കുകയായിരുന്നു.
“തൂഫാൻ” എന്ന പേരിനെക്കുറിച്ചും ആഭ്യന്തര മന്ത്രി വിശദീകരിച്ചു. വിവിധ സംസ്ഥാനങ്ങളിൽ നിന്നുള്ള തൊഴിലാളികൾ, വിവരസാങ്കേതിക മേഖലയിൽ പ്രവർത്തിക്കുന്നവർ, വിദേശ സഞ്ചാരികൾ എന്നിവർ വലിയ തോതിൽ എത്തിച്ചേരുന്ന കേരളത്തിന് എല്ലാവർക്കും ഒരുപോലെ മനസ്സിലാകുന്ന ഒരു പേര് ആവശ്യമുണ്ടായിരുന്നുവെന്ന് അദ്ദേഹം പറഞ്ഞു.
കേരളത്തിൽ ലഹരിമരുന്നുകളോട് യാതൊരു തരത്തിലുള്ള സഹിഷ്ണുതയും ഉണ്ടാകില്ലെന്ന സന്ദേശം എല്ലാവരിലേക്കും വ്യക്തമായി എത്തിക്കുന്നതിനാണ് “തൂഫാൻ” എന്ന പേര് തെരഞ്ഞെടുത്തതെന്നും അദ്ദേഹം വ്യക്തമാക്കി.
കേരള ന്യൂസ് മീഡിയ വാട്സ്ആപ്പ് ചാനൽ പിന്തുടരൂ: https://whatsapp.com/channel/0029Vb7Ks1v1t90adn8xFf2w
കേരള ന്യൂസ് മീഡിയ ഇ-പേപ്പർ: https://chat.whatsapp.com/E78Zp4LoHNTH8dsLXxgdO1?s=cl&p=a&mlu=3
കൂടുതൽ വാർത്തകൾ വായിക്കാൻ: www.keralanewsmediaonline.com
