മുഖ്യമന്ത്രി തീരുമാനത്തിലെ വൈകിപ്പ് കേരളത്തിൽ ഭരണ ശൂന്യത സൃഷ്ടിക്കുന്നുവെന്ന് വി മുരളീധരൻ

കേരള ന്യൂസ് മീഡിയ

റിപ്പോർട്ട്: കിരൺ എസ് പിള്ളൈ

കേരളത്തിൽ സർക്കാർ രൂപീകരണം വൈകുന്നതിനെതിരെ ബിജെപി നേതാവും കഴക്കൂട്ടം എംഎൽഎയുമായ വി മുരളീധരൻ രൂക്ഷ വിമർശനവുമായി രംഗത്ത്. തെരഞ്ഞെടുപ്പ് ഫലം വന്നിട്ട് ദിവസങ്ങൾ പിന്നിട്ടിട്ടും പുതിയ സർക്കാർ രൂപീകരിക്കാത്തത് ഭരണ ശൂന്യത സൃഷ്ടിക്കുകയാണെന്നും ഇത് ജനങ്ങളോടുള്ള അനാദരവാണെന്നും അദ്ദേഹം ആരോപിച്ചു.

വിപുലമായ ജനവിധി ലഭിച്ചിട്ടും മുഖ്യമന്ത്രിയെ തീരുമാനിക്കാൻ കോൺഗ്രസിന് കഴിയാത്തത് പാർട്ടിക്കുള്ളിലെ അധികാര പോരാട്ടത്തിന്റെ തെളിവാണെന്നാണ് മുരളീധരന്റെ വിമർശനം. ജനങ്ങളുടെ പ്രശ്നങ്ങളെക്കാൾ അധികാരമാണ് കോൺഗ്രസ് നേതാക്കളുടെ മുൻഗണനയെന്ന ആരോപണവും അദ്ദേഹം ഉന്നയിച്ചു.

കേരളത്തിൽ മൂന്ന് സീറ്റുകൾ നേടിയെങ്കിലും വെറും ആറു മണ്ഡലങ്ങളിൽ മാത്രമാണ് ബിജെപിക്ക് രണ്ടാം സ്ഥാനത്തെത്താൻ കഴിഞ്ഞതെന്ന വിലയിരുത്തൽ ബിജെപി നേതൃത്വത്തിനുള്ളിലും ചർച്ചയാകുന്നുണ്ട്. വൻ ഫണ്ടിംഗും ശക്തമായ പ്രചാരണവും ദേശീയ നേതൃത്വത്തിന്റെ ഇടപെടലും ഉണ്ടായിട്ടും പ്രതീക്ഷിച്ച രാഷ്ട്രീയ മുന്നേറ്റം കൈവരിക്കാനായില്ലെന്നാണ് പാർട്ടിയിലെ ഒരു വിഭാഗത്തിന്റെ വിലയിരുത്തൽ.

പ്രത്യേകിച്ച് നിരവധി മണ്ഡലങ്ങൾ ഘടകകക്ഷികൾക്ക് വിട്ടുനൽകിയതും പാർട്ടിക്കുള്ളിൽ അസ്വസ്ഥത സൃഷ്ടിച്ചതായി റിപ്പോർട്ടുകൾ സൂചിപ്പിക്കുന്നു. ബിജെപി നേരിട്ട് മത്സരിച്ചിരുന്നെങ്കിൽ കൂടുതൽ മണ്ഡലങ്ങളിൽ ശക്തമായ സാന്നിധ്യം സൃഷ്ടിക്കാനായേനെയെന്നാണ് ചിലരുടെ വിലയിരുത്തൽ.

അതേസമയം യുഡിഎഫിനുള്ളിലും മുഖ്യമന്ത്രി തിരഞ്ഞെടുപ്പ് വൈകുന്നതിനെതിരെ വിമർശനം ശക്തമാകുന്നുണ്ട്. ഐയുഎംഎൽ അടക്കമുള്ള ഘടകകക്ഷികളുടെ ഇടപെടലും തീരുമാനം വൈകാൻ കാരണമായെന്നാണ് എൻഎസ്എസ് ജനറൽ സെക്രട്ടറി ജി സുകുമാരൻ നായർ ആരോപിച്ചത്.

കേരളത്തിൽ രാഷ്ട്രീയ അനിശ്ചിതത്വം നീളുന്നത് ഭരണനടപടികളെയും ബാധിക്കുമെന്ന ആശങ്കയും വിവിധ രാഷ്ട്രീയ കേന്ദ്രങ്ങളിൽ ഉയരുന്നുണ്ട്.

Follow the കേരള ന്യൂസ് മീഡിയ channel on WhatsApp: https://whatsapp.com/channel/0029Vb7Ks1v1t90adn8xFf2w

Read news at www.keralanewsmediaonline.com