കേരള ന്യൂസ് മീഡിയ
റിപ്പോർട്ട് കിരൺ എസ് പിള്ളൈ
ആർട്ടിഫിഷ്യൽ ഇന്റലിജൻസ് അധിഷ്ഠിത സൈബർ ആക്രമണങ്ങൾ ആഗോള സാമ്പത്തിക സ്ഥിരതയ്ക്ക് വലിയ ഭീഷണിയാകാമെന്ന് International Monetary Fund മുന്നറിയിപ്പ് നൽകി. ബാങ്കിംഗ്, ഓഹരി വിപണി, ഡിജിറ്റൽ പേയ്മെന്റ് സംവിധാനം, ഇൻഷുറൻസ് മേഖല എന്നിവ തമ്മിലുള്ള ആഴത്തിലുള്ള ബന്ധം കാരണം വലിയ സൈബർ ആക്രമണങ്ങൾ ആഗോള വിപണികളെ വേഗത്തിൽ ബാധിക്കാമെന്നാണ് ഐഎംഎഫിന്റെ വിലയിരുത്തൽ.
എഐയുടെ സഹായത്തോടെ സൈബർ ആക്രമണങ്ങൾ കൂടുതൽ വേഗത്തിലും കൃത്യതയോടെയും നടക്കാൻ സാധ്യതയുണ്ടെന്നാണ് റിപ്പോർട്ടിൽ പറയുന്നത്. സാമ്പത്തിക സ്ഥാപനങ്ങളിലെ സുരക്ഷാ ദൗർബല്യങ്ങൾ അതിവേഗം കണ്ടെത്തുകയും വ്യാപകമായി ഉപയോഗപ്പെടുത്തുകയും ചെയ്യാനുള്ള ശേഷി എഐ അധിഷ്ഠിത ഹാക്കിംഗ് സംവിധാനങ്ങൾക്ക് ലഭിച്ചിരിക്കുകയാണ്.
വലിയ തോതിലുള്ള സൈബർ ആക്രമണങ്ങൾ ബാങ്കുകൾക്കും ധനകാര്യ സ്ഥാപനങ്ങൾക്കും ഫണ്ടിംഗ് പ്രതിസന്ധി, വിശ്വാസ നഷ്ടം, എന്നിവ സൃഷ്ടിക്കാമെന്നാണ് മുന്നറിയിപ്പ്. ഒരൊറ്റ വലിയ ആക്രമണം പോലും ആഗോള വിപണികളിൽ വ്യാപകമായ അസ്ഥിരതയ്ക്ക് കാരണമാകാമെന്നാണ് സാമ്പത്തിക വിദഗ്ധരുടെ വിലയിരുത്തൽ.
ഡിജിറ്റൽ ബാങ്കിംഗ്, ഓൺലൈൻ ഇടപാടുകൾ, എഐ അധിഷ്ഠിത ട്രേഡിംഗ് സംവിധാനങ്ങൾ എന്നിവയുടെ വളർച്ച സാമ്പത്തിക സംവിധാനത്തെ കൂടുതൽ സങ്കീർണ്ണമാക്കുന്ന സാഹചര്യത്തിലാണ് ഐഎംഎഫിന്റെ മുന്നറിയിപ്പ് പുറത്തുവന്നിരിക്കുന്നത്. സൈബർ സുരക്ഷയിൽ രാജ്യങ്ങളും ധനകാര്യ സ്ഥാപനങ്ങളും വൻ നിക്ഷേപം നടത്തേണ്ട സമയമാണിതെന്നും വിദഗ്ധർ ചൂണ്ടിക്കാട്ടുന്നു.
എഐ സാങ്കേതികവിദ്യ സാമ്പത്തിക വളർച്ചയ്ക്കുള്ള വലിയ അവസരങ്ങൾ സൃഷ്ടിക്കുമ്പോഴും അതേ സമയം പുതിയതരം ആഗോള സുരക്ഷാ ഭീഷണികൾക്കും വഴിയൊരുക്കുന്നുവെന്നാണ് ഇപ്പോൾ ഉയരുന്ന പ്രധാന ആശങ്ക.
Follow the കേരള ന്യൂസ് മീഡിയ channel on WhatsApp: https://whatsapp.com/channel/0029Vb7Ks1v1t90adn8xFf2w
Read news at www.keralanewsmediaonline.com
