കേരള ന്യൂസ് മീഡിയ
റിപ്പോർട്ട്: ദൗ ല ത് ഷാ എം
ഇടുക്കിയെയും കൊച്ചിയെയും ബന്ധിപ്പിക്കുന്ന പ്രധാന ദേശീയപാതയായ NH 85ന്റെ വികസന പ്രവർത്തനങ്ങൾ പുതിയ ഘട്ടത്തിലേക്ക് കടക്കുന്നു. ഗതാഗത തിരക്കും അപകട സാധ്യതകളും കുറച്ച് ഹൈറേഞ്ചിലേക്കുള്ള യാത്ര കൂടുതൽ വേഗത്തിലും സുരക്ഷിതവുമാക്കുകയാണ് പദ്ധതിയുടെ ലക്ഷ്യം.
കൊച്ചി–മൂന്നാർ റൂട്ടിൽ ഭൂമി പ്രശ്നങ്ങളും കയ്യേറ്റങ്ങളും കാരണം വർഷങ്ങളായി മന്ദഗതിയിലായിരുന്ന വികസന പ്രവർത്തനങ്ങൾക്ക് ഇപ്പോൾ കൂടുതൽ ഫണ്ടിംഗ് അനുവദിച്ചിരിക്കുകയാണ് ദേശീയപാത അതോറിറ്റി. അധികമായി ₹160 കോടി രൂപ അനുവദിച്ചതോടെ നിർണായക ഭാഗങ്ങളിലെ തടസങ്ങൾ നീക്കി വികസനം വേഗത്തിലാക്കാനാണ് നീക്കം.
124 കിലോമീറ്റർ ദൈർഘ്യമുള്ള ഈ പാത കേരളത്തിലെ ഏറ്റവും പ്രധാന ടൂറിസം–വാണിജ്യ റൂട്ടുകളിലൊന്നാണ്. മൂന്നാർ, അടിമാലി, നേര്യമംഗലം, കോതമംഗലം വഴി ദിവസേന ആയിരക്കണക്കിന് വാഹനങ്ങളാണ് സഞ്ചരിക്കുന്നത്. മഴക്കാല മണ്ണിടിച്ചിലും ഇടുങ്ങിയ റോഡുകളും ഗതാഗതക്കുരുക്കും ഏറെകാലമായി യാത്രക്കാരുടെ പ്രധാന പരാതികളാണ്.
വിനോദസഞ്ചാരം മാത്രമല്ല, കാർഷിക ഉൽപ്പന്ന ഗതാഗതത്തിനും ഹൈറേഞ്ച് സമ്പദ്വ്യവസ്ഥയ്ക്കും NH 85 നിർണായകമാണ്. ഇടുക്കിയിലെ മസാല, പച്ചക്കറി, ചായ ഉൽപ്പന്നങ്ങൾ എന്നിവയുടെ ചരക്ക് ഗതാഗതം വലിയ തോതിൽ ഈ പാതയെ ആശ്രയിച്ചാണ് നടക്കുന്നത്.
ഇതിനൊപ്പം കൊച്ചി–തേനി ഗ്രീൻഫീൽഡ് ഹൈവേ പദ്ധതിയും ഭാവിയിൽ NH 85യിലെ ഗതാഗത സമ്മർദ്ദം കുറയ്ക്കുന്ന വലിയ പദ്ധതിയായി പരിഗണിക്കപ്പെടുന്നുണ്ട്. പുതിയ ആറുവരി പാത യാഥാർത്ഥ്യമായാൽ കൊച്ചി–തമിഴ്നാട് ചരക്ക് ഗതാഗത സമയം ഗണ്യമായി കുറയുമെന്നാണ് വിലയിരുത്തൽ.
വിഴിഞ്ഞം തുറമുഖം, ദേശീയപാത വികസനം, പുതിയ റെയിൽ പദ്ധതികൾ എന്നിവ പുരോഗമിക്കുന്ന സാഹചര്യത്തിൽ ഹൈറേഞ്ച് മേഖല ഇപ്പോൾ വലിയ ലോജിസ്റ്റിക്സ്–ടൂറിസം മാറ്റത്തിന്റെ ഘട്ടത്തിലേക്കാണ് കടക്കുന്നതെന്നാണ് വിദഗ്ധരുടെ വിലയിരുത്തൽ.
Follow the Kerala News Media channel on WhatsApp: https://whatsapp.com/channel/0029Vb7Ks1v1t90adn8xFf2w
Read news at www.keralanewsmediaonline.com
