വി ഡി സതീശനെ മുഖ്യമന്ത്രിയാക്കണമെന്ന ആവശ്യം ശക്തമാകുന്നു

കേരള ന്യൂസ് മീഡിയ

റിപ്പോർട്ട് കിരൺ എസ് പിള്ളൈ

കേരളത്തിലെ പുതിയ മുഖ്യമന്ത്രിയെ തിരഞ്ഞെടുക്കാനുള്ള ചർച്ചകൾ ശക്തമാകുന്നതിനിടെ വി ഡി സതീശനെ മുഖ്യമന്ത്രിയാക്കണമെന്ന ആവശ്യം ഉയരുന്നു.

കൊച്ചിയിലെ നെറ്റൂരിൽ സതീശന്റെ അനുയായികൾ പ്രകടനം സംഘടിപ്പിച്ചു. “തിരഞ്ഞെടുപ്പ് പോരാട്ടം നയിച്ചവൻ തന്നെ സംസ്ഥാനത്തെ നയിക്കണം” എന്ന മുദ്രാവാക്യവുമായി വലിയ ഫ്ലെക്സുകളും പ്രവർത്തകർ ഉയർത്തിക്കാട്ടി.

അതേസമയം തിരുവനന്തപുരത്ത് കോൺഗ്രസ് നിയമസഭാ കക്ഷി യോഗവും എഐസിസി നിരീക്ഷകരുടെ നേതൃത്വത്തിൽ എംഎൽഎമാരുമായി വ്യക്തിഗത ചർച്ചകളും നടന്നു. 63 കോൺഗ്രസ് എംഎൽഎമാരുടെ അഭിപ്രായങ്ങൾ നേതൃത്വം ശേഖരിക്കുകയാണ്.

യുഡിഎഫിന്റെ തിരഞ്ഞെടുപ്പ് പ്രചാരണത്തിലെ പ്രധാന മുഖങ്ങളിലൊരാളായിരുന്നു വി ഡി സതീശൻ. 102 സീറ്റുകളുടെ വൻവിജയത്തിന് പിന്നാലെ മുഖ്യമന്ത്രിപദത്തിനായുള്ള ചർച്ചകളിൽ അദ്ദേഹത്തിന്റെ പേര് ശക്തമായി ഉയർന്നുവരുന്നുണ്ട്.

ഇതിനിടെ കെ സി വേണുഗോപാലിനും പിന്തുണ ഉയരുന്നുവെന്ന റിപ്പോർട്ടുകളുണ്ട്. നിയമസഭ തിരഞ്ഞെടുപ്പിൽ മത്സരിച്ചില്ലെങ്കിലും അദ്ദേഹത്തെ മുഖ്യമന്ത്രിയാക്കണമെന്ന് ആവശ്യപ്പെട്ട് ചില വിഭാഗങ്ങൾ രംഗത്തുണ്ടെന്നാണ് സൂചന.

മുതിർന്ന കോൺഗ്രസ് നേതാവ് രമേശ് ചെന്നിത്തലയുടെ പേരും പരിഗണനയിൽ തുടരുന്നു.

കേരളത്തിലെ പുതിയ മുഖ്യമന്ത്രിയെക്കുറിച്ചുള്ള അന്തിമ തീരുമാനം കോൺഗ്രസ് ഹൈക്കമാൻഡ് ഉടൻ പ്രഖ്യാപിക്കുമെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്.

Follow the കേരള ന്യൂസ് മീഡിയ channel on WhatsApp: https://whatsapp.com/channel/0029Vb7Ks1v1t90adn8xFf2w

Read more news at www.keralanewsmediaonline.com